Ka National Medical Commission da pynbna ko wa da e mynjur ko neibynta ki Medical College thymme yow sdang noh ki heiwa da em leh i pyrtuid ka Shillong Medical kawa da yoh wow sdang deiwa em 50 tylli ki Medical Seat.
Neiliang ka Meghalaya da paan ko 50 tylli heiwa da yoh leh i mynjur ya waroh 50 tylli.
Ki Medical College thymme waroh da em ki 21 tylli kiwa da paan Seat heiwa da em kiwa paan 100 tylli wei da yoh 100 tylli wei em won kiwa paan 100 tylli tangwa da yoh ki 50 tylli wei em leh kiwa paan 50 tylli wa 100 tangwa ym em yoh kawi leh.
Neiliang u Montri Rangbah ka jylla, u Conrad Sangma da ong u wa uni toh u moomær wa thymme hei lai luti wow sdang ya ka Medical College hapoh ka jylla wei ya ka Counselling u sdang noh ha ka 4 tarik uni u bnai katwa ki Class u sdang noh ki pyn ha ka 27 tarik uni hi u bnai katkam ka NEET-UG Schedule.
Da ong u leh wa ini toh iwa angnood da slem bha wei kattu da mankaam i.
Neiliang ka Health Minister, ka Dr. M. Ampareen Lyngdoh da ong ko wa na kini ki 50 tylli ki MBBS Seat, 85% u man ki neibynta kiwa na Meghalaya yow yoh myntoi ki na kani ka College wa thymme.
Da pyntip ko leh wa ka bai puræ ha ka chi snem u man ko du ₹30,000 donhi kawa kynthup ya ka bai Tuition wa ka bai sah. Da kular ko leh wa kiwa sikai u man ki kiwa biang bha kiwa ye wow e yei stat wa pliah.
Ya ka Shillong Medical College u pynkrehkaam ka na ki thaw wa da em chwa kiwa da pynchna thymme yow yatoh katkam ki kyndon wa da booh hapoh ka ri.
