Ynne ka sngi, ka yung bichaar u N.A. Khan, District & Session Judge, Jowai da rai pynrem ko ya u Dros Pakem hapoh ka Section 304 Part II ka IPC hei kaam pynmynsoo bru hadooh wa yap.
Kani ka Case toh katkam ka FIR wa da yoh ha ka 24-07-11 wa da booh uwa chi payu uwa yap ha u OC ka Jowai Police Station.
Katkam ka FIR, ini da jia i ha ka 23-07-11 heipor kamwa 10:00 waje i miet heiwa u Dros Pakem da dat u ya u Dao Pakem da kawi ka knor dieñ na khlieh ha Mooralong, Jowai wei neidaw wa joor mynsoo u Dao da khlaad noh u ha ka 24-07-11 heipor wa kit ya oo cha Civil Hospital, Jowai.
Ya kani ka Case da takit wei da Charge Sheet da u SI E. Pohchen deiwa pynngat hapoh ka Section 302 ka IPC.
Hadien wa pyndep yei bichaar, da phah kset ya u Dros Pakem ar snem deilang ka kuna wa Rs. 2000.
