Ka Shangpung College, Nongrim Shangpung, hapoh i yahkhmat ka khon yong u MLA ka thaaiñ, ka Larishisha Suiam ha ka 30 tarik da pynman ya i pynkhooid ya ka chnong Shangpung, West Jaiñtia Hills District.
Ya ini i pynkhooid chnong da kyrchaan da u Montri ka sorkar jylla uwa man u MLA ka thaaiñ, u Comingone Ymbon hajrong ka thong wow wanrah wei pynneh yei khooid i jngiar.
Yeini i pynkhooid da sdang na Phramer wei da sakhi wa waroh ki dukan kiwa em hapoh ka chnong Shangpung da man kiwa khang khyrdep lut wei waroh kiwa chong chnong nadooh ki manbei manpa, ki kynthai wa chynrang hadooh ki khynnah da embynta ki ryngkat ki wait, ki wakhu wa ki saroo ha kti. Katwa ki khynnah ka Shangpung College da chim ki wow pynkhooid ya ka Iawmuchai waroh kawi.
Chwa wow sdang da em ka yalang ha Iawmuchai hei emlang u Comingone Ymbon deilang u MDC ka thaaiñ, u Mihnyngkong Sutnga, u EE PWD Shangpung Division, u K. Pakma, u President ka Governing Body Shangpung College, u P. Marwein, u Principal ka College, u Dr. D.G. Lyngdoh, u Dolloi ka Elaka Shangpung u Chanki Langbang, ki waheh chnong wa kiwi.
Hawa klam pynchlur ya kiwa chong chnong wow wanrah yei khooid, u Comingone Ymbon da ong u wa lada uwi pa uwi em ki i kitkhlieh hajrong i khooid, ka Shangpung daw tam ko ya ka Mawlynnong ka chnong wa khooid tam ha Asia.
Da kyntu leh ya kiwa em ha ka yalang, khamtam ki khynnah ka Shangpung College wow rah wyrta cha yung cha sem wa imlang sahlang hajrong i emkaam i khooid i jngiar ka chnong ka thaw.
U MLA da kyntu u leh ya waroh wym toh u noh khiar yei jhep wa ki Plastic ha ki luti syngkieñ neibhah wa ktah ko ya ka mariang wa waroh kiwa im ha ka.
Ha kani ka sngi u Comingone da pynbna u leh wa ha uni hi u snem daw e u ya ka kari kit jhep wa thymme ya ka Shangpung Pyllun na ka MLA scheme.
Ka Larishisha Suiam da ong ko wa ini toh chibynta wow pynsñiawthooh paidbah wa i lehkhooid man iwa emkaam ym du ha yung tangwa ha ki thaw paidbah, ki yaaw wa ki soodong sookun.
