Ka thaw sait kari wa thymme wa pyrtuid Ram Ma Sateiñ RJ93, kawa em ha Ialong Toll Gate ha chrooh ka New Rajasthan Hotel da wai paidbah ya ka ha ka 30 tarik uni u bnai.
Ya kani ka thaw sait kari da mantre da u Raja Sateiñ, wei ha kani ka sngi wai paidbah da wan sakhilang kiwa ha-yung ha-sem yong oo, ki lok ki jor wa kiwa chah khut sñiawbha.
Ha ka yalang tbian wa pynlai da u ma yong u Raja, u Wansalan Sateiñ da yoh i klam tbian na u Dapoiwanmi Laloo, na u Ribok Biam wei kam kiwa chah khut kyrpang hawa klam da e ki i yaroh ya u Raja wa chim u kam kani ka laad wow yieñ hei yong oo hi i kjat. Heijooh i por leh ym du wa da ye u wow sdang khih tangwa da e khih haroh u ya kiwi tawon.
Kamtæ yooluti ki wa kani ka thaw sait kari u man ko kawa e nong e myntoi ya u Raja kam u tre, kamjooh leh ya ki paidbah wa wan sait kari.
Ka bei u Raja, ka Alma Sateiñ chwa wow ah ya u Ribbon kam ka dak i wai paidbah da booh ko leh i duwai kyrkhu kyrdoh yow man ka dukan kawa pynmyntoi ya u khon yong ka kamjooh ka yung ka sem.
Kani ka thaw sait kari u wai nadooh ka sngi Monday hadooh Sunday nadooh 7:00 waje i step hadooh wa miet.
