Ka Indian Red Cross Society, West Jaiñtia Hills Unit ha ka thong wow pynkhlan yei rukom krehkaam hapoh ka District, ha kani ka taiaaw nadooh ka 27 tarik hadooh ka 29 tarik da pynman ko ia ka First Aid Training ha Iung Dorbar ka Lion Mission Compound Dorbar Chnong.
Ha ka ialang iah khmat wa tbian hei pynlai ka S.Tariang, Senior Life Member IRCS, u W. Lyngdoh, Chairman IRCS, West Jaintia Hills da man u kam u kongsan heiwa da ioh i klam pdiang burom na ka Emidaka Lyngdoh, Organiser Junior Red Cross Society, West Jaintia Hills, i klam i khana shaphang ka Junior Red Cross wa ka Youth Red Cross na u O. Laloo, Secretary IRCS, West Jaintia Hills katwa u H. Khongstia, Life Member IRCS hei pynkut e u ki kyntien khublei.
U O. Laloo hei klam, da ong u wa ka thong iong kani ka e sikai toh wow khriñ ia ki khynnah skur wa ki khon khynroo khyllood u ia embynta ki wa ka Indian Red Cross hei dur iong ki Junior Red Cross wa ki Youth Red Cross wei shooh shooh da khana u leh ia ki iurim kreh kaam ka Indian Red Cross Society kam ka seiñ krehmon sñiawbha wa em hapoh ka ri India kawa yieñ wow e i chakri wei iarap ia ki para bru ha ki dur ki rukom waphær.
Neiliang u W. Lyngdoh, Chairman IRCS, West Jaintia Hills hei klam kam u kongsan da kdar u wow pynsñiaw ia ka Pledge iong ka Indian Red Cross Society wei da khana u leh kyrpang ya ki 4 tylli ki iurim iong ka Red Cross Society kiwa ong “Care of your own health and that of other, Understanding and acceptance of civic responsibility, Maintaining the spirit of friendly, helpfulness towards other children in our country and all over the world, Disseminating Red Cross Movement.”
Ha kani ka First Aid Training da wan wow e sikai da ki bru stat bru shemphang iong ka Indian Red Cross Society na Shillong kiwa kynthup ya u P. Deb, u Albert CL Nongrum, ka MGR Shabong wa ka Ibanylla Swer wei ki khynnah skur kiwa da wan wow shah sikai ha kani ka First Aid Training toh kiwa da wan na Kiang Nangbah Govt. Higher Secondary School, Jowai, na Thomas Jones Hr. Secondary School, Jowai, na St. Mary Mazzerllo Hr. Secondary School, Jowai, na Govt. Boys Hr. Secondary School Jowai, na Govt. Girls Hr. Secondary School Jowai, na KJP Synod Mihngi Hr. Secondary School, Jowai Presbyterian Secondary School, na Seinraij Hr. Secondary School, Jowai, na Thadlaboh Presbyterian Hr. Secondary School, na St. Michael & All Angel’s Sec. School, na Modern Secondary School, Ialong, na Mookyndur Secondary School wa na Little Angels Secondary School, Jowai.
