U Montri Rangbah ka jylla, u Conrad K Sangma da pynman u ia ka Review Meeting ha Circuit House ka Tura innin ka sngi iow pait iei pynkreh ia kiwa boon ki kaam deilang kiwa iatoh wa ka Jal Jeevan Mission (JJM).
Ha ini iachem da pyntip wa katkam ki Report, dadep hadooh 90% ki kreh tangwa i man i long ha ki chnong ki thaw won ym em iatoh i neibhah wa 20% ki manyung ym pu em ioh umkor ki.
Neiliang u Montri Rangbah da ban joor u yei emkaam wow leh ia ka Audit ha waroh kawi ka jylla iow tip kiwon ki Scheme kiwa krehkaam wei kiwon ki wym em krehkaam iow tip i yi u leh. Da ong u leh wa ha ki thaw wa riat manda dooh bordiñ da ktah ko leh iei pynpoi um, wei ha ki thaw wa man madan ki Solar ym em ye u pynbiang ki katkam wa emkaam.
Da iaklam leh yei em ki Village Water and Sanitation Committee ki wym em u kitkhia wei ym bien ki wow leh ieiwa da pynkit ha ki lada ym ioh iarap poisa ki.
Da shem leh wa em ki kreh wa sdang nyngkong toh deiwa kreh deiwa pynemkaam da ki warim wa em chwa wei ym em da pynkhreh yow pynpoi um cha kiwa boon ki bru, em leh kiwa boon wa pynkhreh ya ki DPR khlem da pyrkhat yei em ki thaw taan um, khlem da biang ki Pipe wei em leh wym em pynkrehkaam ki Contractor deiwa biang.
Najrong kini da em leh i pynslem wow yoh ya ka Forest Clearance heiwa neiliang u Conrad da pdiang u wa manda kreh jhan leh daw ktah i kreh heiwa daw em i leh khalær.
Da em leh i ktah neidaw wym pu em su ka bai kreh ki Contractor kawa dapoi jan ₹2,000 klur wei ini toh neidaw wa pynslem ka sorkar pyrdi wow pynlait poisa.
U Conraad da yooluti u wa ini waroh daw miat daw bha i kat dang lai ki snem deiwa kdaw leh wa u yarap ya ki VWSC daw hap wow pynlut kamwa ₹500 klur chi snem iwa eh bha u leh da ka sorkar jylla wei yow pynstiñ yeini toh u pyrchang dei ya krehlang chirup kiwa boon ki chnong deiwa ya krehlang leh wa ki Self-Help Group, ki NGO wa kiwi de ki seiñ.
Da e buit leh wow tyrwa da ka Maintenance Contract heiwa ki Contractor u bahkhlieh ki yeini i kaam 2-3 snem deiwa sikai ya kiwa chong kammon wow leh yeini i kaam.
