Ka chnong Panaliar hadien wa da chimkti pura ko ya ka Syntu Ksiar Fish Sanctuary wow pait u pynlai ko da ka; da e kti won ha ka Panaliar Tourism & Environmental Development Society (PTEDS) wow pynlai ya waroh ki kaam.
Kamtæ hawa lai pait lai sylli ha ka 26 tarik uni u bnai hadien wa da yoh ya kiwa boon ki ujor yei khwe dakha ki bru na kylleiñ ha katai ka thaw. Ka Executive Committee ka chnong dei mynsien wa sñiawkhia, da chim ko ka rai wow pynchitom deiwa daiñ kuna ₹10,000 ya kiwon kiwon kiwa khwe ha kani ka Fish Sanctuary kawa da khang pyrchah ka chnong, heijooh i por u e ya ka buskit ₹5000 ya kiwa pyntip khlem da pynmih yei pyrtuid yong ki.
Kiwa chah kem najrong wa chah daiñ kuna daw phah kset leh ha ki pulit chirup wa ki kyndon wow pynchitom ya ki, da pyntip u Waheh Chnong, u Riquoma Rq. Laloo.
Kamtæ neiliang ka chnong, booh ko ki kyntu ya warohlang wow ya krehlang wa ka, nadooh i khooid i pliah charood cha kiar, heijooh i por wow ya paitlang lada em kiwa khwe deiwa wan chakhmat wow pyntip khlem tieñ neibhah ka chnong u emlang ko wa ki.
Da kyntu leh ya kiwa wan na jan na jngai, wow tip u kheiñkor ya ka ramaw wa ki tawiar soodong yong ka dei wym hoi u pynjæd pynpra ya ka wei kamjooh ya kiwa lai pait-ke dei mynsien wa khooid da khang pyrchah wow wan da i mynsien wow leh pynsih.
