Kam chibynta wow pynchlur ya ki khynnah skur wow thooh bniah, wow pyrkhat ya ki buit wa thymme, wow tip chaphang i stat ka juk wa katni, neiliang ka yung krehkaam ka District School Education Officer (DSEO), East Jaintia Hills District, ha ka 28 tarik da pynman ko ya ka District Level Science Seminar hajrong ka phang wa ong “The Quantum Age Begins: Potentials and Challenges” ha Jaintia Eastern College, Khliehriat.
Da wan wow chimbynta da ki 8 tylli ki skur ka District kiwa da pynyoo yei sap yong ki deiwa pynyoo da ki dur ki dar heiyatoh wa kani ka phang wa kamon ka juk Quantum Age u pykylla dur ko ya ki kor, ka khayi pateiñ, ki karkhana wa kiwi de.
Ki khynnah wa chimbynta da hap ki leh wow jubab yeiwa da kylli ya ki chaphang iwa da pynyoo ki.
Hadien wa dep u bichaar, da jied ya u Peter Arsalon Pyngrope na Khliehriat Higher Secondary School kam uwa yoh nyngkong, u Beneiah Gadiel Sutnga na Little Star Secondary School, Ladrymbai kam uwa yoh wa ar wa ka Bornah Rabha na Rymbai Government Secondary School kam kawa yoh wa le.
Kiwi de ki skur wa chimbynta toh ka Sacred Heart Secondary School, Byndihati, ka Little Flower Secondary School, Khliehriat, ka Sutnga RMSA Secondary School, ka Khliehriat Presbyterian Higher Secondary School wa ka Little Star Academy Secondary School, Khliehriat.
Kiwa jop da yoh ki da ka song poisa wa Certificate.
