Ka kynhun Anti – Narcotics Task Force (ANTF) ka East Jaintia Hills District ka la ioh ban kem noh ia ki Ar ngut ki snar nongkhaii drok na Umkiang bad Shillong BAd la ioh ruh ban kurup shibun bah u drok Heroin.
U Superitendent of Police, East Jaintia Hills District, Vikash Kumar, IPS u la ong hadien ka jingioh jingtip ka ba tikna ka kynhun ANTF ha ka miet 25 tarik Nailar 2025 ka la pynlong ia ka jingpynap shrip ha kawei ka jaka kaba hap hapoh Lumshnong Police Station ha kaba ki la ioh ban bat noh ia uwei u briew uba la tip kyrteng kum u Hajrat Umar 28 snem ka rta uba dei na Kaliachak, District Malda, West Bengal bad ioh ruh ban kurup 11 tylli ki synduk sabon kiba don haduh 137.86 grams u Heroin uba shongdur haduh T.60 lakhs bad ar tylli ki Mobile phone.
Hadien ka kynhun ka la ioh ban kem sa ia uwei pat u snar nongkhaii drok u ba kyrteng u Phulchand Ali uba na Lum Survey, Shillong uba donkti ha ki kam khaii drok na kawei ka jylla sha kawei pat bad uba don bynta halor kane ka jingioh kurup drok.
Ki pulit ki la Register Case hapoh Lumshnong Police Station hapoh ka NDPS Act bad ka jingtohkit mynta ka dang iaid sha khmat ban lapdien ia kiwei pat kiba donkti ha kane ka kam khaii drok.
