Ka NPP Primary Unit Mission Compound, Jowai haka 28 tarik Nailar ka la pynlong ia ka lympung ialehkai kaba tip kum ka 6-Aside Football Tournament ha madan Biar Skur, Jowai.
Ia kane ka lympung ialehkai la wan plie ia ka da u Working President ka NPP West Jaintia Hills District u Ma Nidamon Shullet kum u kongsan, Edystone Shylla kum u symbud kongsan. u Waheh Shnong ka Lion Mission Compound Ma DH Synrem nalor kiwei kiwei.
Haba pyniaid ia ka jingialang u Chairman u Ma Donkupar Synkrem u la pyntip ba la don 26 tylli ki kynhun ialehkai kiba la iashim bynta bad ka jingthmu ka long ban wanrah ka jingia ithuh ithaw bad ka jingiatylli hapdeng ki samla hapoh ka 2-Jowai Constituency.
U Ma Nidamon Shullet ha ka jingkren u la iaroh ia ki nongialam ka NPP Primary Unit Mission Compound, Jowai halor ka jinglah ban pynlong ia kaba kum kane ka lympung ialehkai kaba long ka jingmyntoi ia ki khun samla kiba don ka sap ialehkai.
Haba pynpaw halor ka jingkongsan jong ka jingialehkai sports, u Ma Nidamon u la ong ym tang ba ka long ka bynta jong ka koit ka khiah bad ka lad ioh kam ioh jam, hynrei ba ka long ruh kum kawei ka shlem hikai ba ki samla kin lait na ki jingdih ba sniew.
U Ma Nidamon u la kyntu ruh ia ki samla ban trei shitom namar ka jingialehkai phutboll ha kine ki sngi ka dei ka karkhana kaba lah ban ai kam ai jam ia ki samla ba kin ieng hala ki kjat.
Ia ka jingialang la pynwai da ki kyntien khublei na u President NPP Primary Unit Mission Compound, Jowai, Ma Heipormi Dhar.
Haba phai sha ka jingialehkai ha ka sngi sdang ia kane ka Football, ka Loomkyrwiang ka la jop kput haduh da 9-1 pyrshah ia ka Mynthong-B.
