Ki pulit da man ki kiwa husiar bha ha ka jylla Bihar hadien wa tip tikna wa le ngut ki Terrorist na Pakistan da psiah ki cha ka jylla na Nepal. Ka Headquarter ka Bihar Police da phah ko leh ya ka Notice cha waroh ki District Police chirup wa i pyrtuid wa i dur kini ki Terrorist ka Jaish-e-Mohammed heiwa da suba wa da psiah ki cha India lyngba ka Araria, Bihar hadien wa wan ki na Nepal.
U DGP ka Bihar, u Vinay Kumar da kubur u yeini wei da phah ya ki pulit wow man kiwa husiar wei wow pynkhlan ki ya i uiñ Patrolling.
Kini ki Terrorist ka Pakistan da tip kam u Hasnain Ali, u Adil Hussain wa u Mohammad Usman heiwa u Hasnain toh uwa na Rawalpindi, u Adil na Umerkot katwa u Usman won na Bahawalpur.
Kam wow kdaw heini wa ka Bihar em ko ya u pood wa laitlaan bha wa ka Nepal.
Hadien ini ki pulit leh da pynkhlan ki ya i sonteri ha ki thaw uiñke suwari kam ha Rajgir, Bodhgaya, Patna wa kiwi ki thaw.
Ki pulit leh da pynbna ki Rs. 50,000 ya kiwa pyntip heiwon em kini ki 3 ngut.
