Ka France khaddooh da pynuiñ ko ya le tylli ki chyieñ khlieh bru cha ka Madagascar, hei wa iwi na kini ki khlieh toh ki yong u Syiem Toera ka jaitbru Sakalava.
U Syiem Toera da chah tynyap u ha ki chipai ka France ha u snem 1897 wei da rah ya i khlieh u cha Paris wow booh ha Museum wa em ha Paris hi hadooh kamwa 128 snem.
Ha u Naisaphra 1897, ka France da hiar thma ko ya ka Menabe State ha thaaiñ sepsngi ka Madagascar kam chibynta wow pynheh yei synchaar ko hei wa da em i chah tynyap khiar ki bru ha thaaiñ Sakalava.
Hadien wa tynyap ya u Syiem Toera, da pam ya i khlieh u wow rah cha Paris, heiwa da booh yei khlieh ha Natural History Museum.
Katkam ka Reuters da ong wa ya ka yalang wow e kti ya kini ki khlieh da pynman ha Ministry of Culture ka France.
Chirup wa i khlieh u Syiem, da em leh ar tylli ki khlieh na ka jaitbru Sakalava heiwa da sap ya ki da ki that ka Madagascar wei da thap ya ki hapoh ki synduk. Ini da man iwa ye u leh hadien wa yakhun slem ka sorkar Madagascar wei da pynjem ka France ya ka aiñ ha u 2023 wow pynuiñ ya ki dkhot i doh ki bru.
Ini man i leh kam chibynta i kreh ka France wow pynuiñ ya ki dkhot i doh bru cha ki ri wa jooh synchaar embor ko wei da sdang i deiwa pynuiñ ya i metyap ka Sarah Baartman cha South Africa ha u 2002.
Katkam wa man katni ka Musée de l’Ome Museum wa em ha France em ko palat 30,000 tylli ki chyieñ wa ki khlieh bru heiwa ki ri kam ka Argentina wa Australia da dawa ki wow pynuiñ ya ki.
Ka sorkar Madagascar da pyrkhat ko leh wow pyndep ya ka niam wa khaddooh neibynta kini ki khlieh.
