Shibynta ban ai mynsiem bad pynshlur ia ki samla pule ban bteng ia ka thong jingpule kiba kham shalor, ka Thomas Jones Synod College, Jowai ha ka 29 tarik Nailar 2025 ka la rakhe ia ka ‘Graduation Day’ da ka ba pynkup burom ia ki 240 ngut ki samla pule kiba la pyndep ia ka Bachelor of Arts (BA), Bachelor of Commerce (B.Com), bad ki Higher Secondary (HSSLC).
Ha kane ka sngi la ia don lang u Symbud Myntri Rangbah ka Jylla u Bah Sniawbhalang Dhar kum u Kongsan ha ryngkat u Rev. S.R. Dkhar, Moderator ka KJP Sunod Mihngi kum u Symbud Kongsan.
Haba ai jingkren sha ki samla pule, u Bah Sniawbhalang u la ong ba kane ka sngi ka dei ka jingsdang kaba thymmai kada dap da ki jingialeh, ki thong bad ki lad ki kabu kiba thymmai. U la kyntu ia ki samla ban jied ia ka lynti treikam kiba ki sngewtynnad da kaba ban jur ba ia ka jingjop kaba shisha um lah ban thied da ka dor.
U pynkynmaw ruh ia ki samla ba kim dei ban duh mynsiem namar ki jingbym lah, da kaba kdew ba bun kim shym la ioh ia ka lad wat ban pyrshang. Haba pynshlur ia ki ban peit shabar na ki kam sorkar, u Myntri u la pynpaw ba ka Meghalaya ka don ha ka kyrdan kaba lai ha ka jingdon bun eh ki samla, ha kaba 49 percent ki dei kiba don hapoh kaba 19 snem ka rta, kaba pynlong ia ka sorkar ba kan ym lah marwei ban ai kam ai jam sha baroh.
Hynrei u la kdew ba ka sorkar hapdeng ka jingialam u Myntri Rangbah ka Jylla u Conrad K. Sangma ki la plie ia ki katto katne ki lad ki lynti, kum ka CM Elevates, Prime Hub, Yess Meghalaya, Ginger Mission bad Lakadong Mission ban kyntiew ia ki nongseng kam seng jam, ka jingpynroi ia ki sap ki phong bad ki lad ioh kam ioh jam.
“Ka pule puthi kam pyntikna ia ka kam sorkar, hynrei da ka jingnang jingstad ryngkat ka jingkut jingmut, ki lad ki kabu barabor kin plie beit na ka bynta jong ki,” ong u Myntri haba khot ia ki samla ban long kiba trei shitom bad kiba iai shah.
Shwa kane u Principal, Dr. A. Nongbri, u la ai ia ka jingkren pdiang bad bud da ka jingduwai na ka Kong R.B. Dkhar, Assistant Professor ka Khasi Department bad ka jingkren na u Lionel War, President ka Alumni Association.
Ha ryngkat ki samla kiba la pyndep Graduate la pynkup burom kyrpang ruh ia ki khyndai ngut ki smala pule kiba wan ha ki kyrdan kiba shakhmat. Napdeng kine ki kynthup ia ka R. Gracedalyne Rose Tang, kaba wan ha ka kyrdan 9th position ha ka NEHU Examination 2025 bad ioh ha khliehduh ha ka English Department. Kiwei pat ki kynthup iaka Memorial Lyngdoh (Khasi), Effie Vanroy Ryngkhlem (Political Science), Yookini Phawa( Educatiuon), Darihun Tyngkra (Philosophy), Visakadaroy Lakiang (Commerce)
Ha ka kyrdan HSSLC ka jingpynkup burom ka leit sha ka Steffie Banrilily Dkhar (Arts), Leiki Daeimiki Wan (Science), bad Lamdame Pariat (Commerce).
