Ka sorkar da em thmu ko wow chna ya u sarok Eastern Bypass wa jrong 9.95 Km na Sohryngkham cha Mawshbuit wa Mawlynrei yow mih cha New Shillong wei yeini da pyntip da u Symbood Montri Rangbah, u Prestone Tynsong uwa pait leh ya ka chnat PWD(R) hawa klam hapoh ka yung dorbar chna aiñ yow pynduna yei khynnia ka Shillong yow lait ki kari u psiah napoh sor.
U Prestone da ong u yeini hawa jubab heiyatoh wa u sarok wa jrong 600 meter na Mashbuit cha Happy Valley uwa lai nei thaw ki chipai ka 58 Gorkha Training Centre kawa da booh leh da ka Gate ha uni u sarok iwa da pynthut yei lai i wan ki paidbah.
Yow chna ya uni u sarok thymme, ka sorkar da yoh ko yei thaw wa da e da ka chnong Mawshbuit wei katkam wa leh Survey, uni u sarok daw haap u hapoh ka Mawshbuit-Mawlynrei kamwa 4 Km heiwa 300 meter won daw hap lai luti nei thaw ki chipai. Wei neibynta ini da yaklam ka sorkar wa ki chipai yow yoh u chna ya uni u sarok.
U Prestone da ong u wa manda ye u pynyabi ya ka Sohryngkham-Mawshbuit wa Mawshbuit-Mawlynrei daw tip noh ya uni u sarok kam u Eastern Bypass yow pynsuk ya ki kari wa mut wow lai cha Shillong wei da sñiawskhem wa ka sorkar daw ye ko wow pynbait yeini.
Heiyatoh wa u sarok wa jrong 600-metre ha Mawshbuit–Happy Valley wa em hapoh i pait ki chipai uwa da sih bha, da ong u wa ka sorkar da yaklam ko wa ki chipai wow pynchna ka wei lada ym leh ki, ka sorkar da pynkhreh ko wow chna da ka.
Da ong u leh wa neibynta u sarok thymme da yooluti wow yoh NOC noh ym slem de na ki chipai yow suk noh kiwa chong chnong ka Mawshbuit.
