Ka sorkar jylla da pynbna ko wow kyrchaan ya kiwa lai puræ kiwa wan na ki manyung wa dooh wa duk wow lai puræ B.Sc Hospitality & Hotel Administration ha IHM, Shillong.
Hawa klam wa kiwa thoh khubor, u Montri wa pait ya ki kaam uiñke suwari uwa man leh kam uwa e ktien ka sorkar, u Paul Lyngdoh da ong u wa ka sorkar daw pynlut ko 100% ka Tuition Fee.
Da ong u wa ini i lai puræ wow kyrchaan u man ko neibynta 3 snem wei daw jied 55 ngut chisnem wei neibynta ki 3 Batch (3 snem) ka sorkar u kyrchaan ko hadooh 165 ngut ki wow lai puræ.
Da pyntip u leh wa i jied ya kini ki wow lai puræ toh uwi næ kawi na kawi ka Block kiwa daw jied da ki BDO ki Block wei daw rai khaddooh da ka State Level Selection Committee. Najrong ini, kini toh u man ki kiwa chong chnong wa pura ka Meghalaya, kiwa da pyncep Class-XII wa kiwa lehbha ha ka Subject English wei toh u wan ki na ki manyung wa yoh du Rs. 3 lak chisnem.
U Paul da pyntip u wa neibynta ki 165 ngut daw pynlut ka sorkar hadooh Rs. 6,06,57,475 kawa man kamwa Rs. 3.7 lak uwi/kawi wa lai puræ.
