U Kyrmen Shylla, Montri ka sorkar jylla ynne ka sngi da wai paidbah u ya kawi ka skur thymme kawa pyrtuid “God’s Glory English School” kawa em ha Moowamon, Mihmyntdu kawa ye u chem deiwa lai na ka laad wa em mar pyrchah ka yung krehkaam u DTO, Jowai wei kani ka skur u sdang ko nadooh u snem 2026 da ki Tiny Tots hadooh Class V.
Ha kani ka sngi wai paidbah ya kani ka skur da emlang nadooh ki MDC ka JHADC wa kynthup ya u Wailad Dameshwa Siangshai, u Rikut Pareiñ wa u Gresentus Susngi, najrong kiwi won ki bru waheh wasian, kiwa yahkhmat chnong ka Moowamon, kiwa chah khut sñiawbha wa kiwi.
Ha ka yalang wa pynlai da u Chairman yong kani ka skur, u Piwell Shylla, neiliang ka tre skur ka Shimti Shylla da khana ko yei lai luti yong ka hadooh wa poi u seiñ u sdang ko ya kani ka skur.
Katwa u Chief Adviser, u Dr. Prince Stone Shylla hawa klam da pynsñiaw u i sñiawngooh ya waroh kiwa embynta u kyrchaan wei e mynsien ya ka yung ka sem yong ki hadooh wa poi kani ka sngi wa da yoh ki u wai.
Ong u kamwa ka Moto yong kani ka skur ong ko “Wisdom With Godliness” mut i wa i sdang ki ya kani ka skur ym du wow e i tip i stat hei puræ puthi tangwa wow sikai leh ya ki khynnah heiyatoh wa i akor i burom, wei yow heh u san ki ha ka luti yow miat u bha ka mynried yong ki.
Ngait skem u leh wa i ye u wai ya kani ka skur ymtoh du kat wa jop i angnood yong ki kam ka yung ka sem, tangwa yooluti ki wow man i myntoi wa khroo ya ki paidbah wa chong chnong wa ki marjan.
U Kyrmen Shylla hawa klam kam u kongsan ong u, kamwa kattu u sdang lai luti noh kani ka skur, da emkaam u kreh chitom neibhah wa u soh wow mih na kani ka skur ye u chynna hadien 5 snem i lai luti.
Neitæ kular u wow e 5 tylli ki Computer kamwa da paan kani ka skur neibhah wa kwah ki wow e lang leh i tip i stat heiyatoh katkam ka juk wa katni lyngba ka Computer.
Khana u wa nachwa oo leh em u i angnood wow seiñ ya ka skur tangwa hadien wa da chah jied won u kam uwa mihkhmat paidbah, da kylla noh i pyrkhat yong oo neibhah wa yoo u chiboon ki skur wa emkaam i dawa i yarap, kamtæ rai noh u wa heithaw wow pynlut u chna u da ka skur yong oo hi dang bha u e yarap cha kiwi ki skur.
Ong u wa sñiawkmen u leh wa ha East Jaiñtia Hills District lyngba i em ka DMF wei dei ya sñiawthooh lang ki ar MLA ka East Jaiñtia oo wa ka Santa Mary Shylla da e bor ki ya u DC wa kiwon kiwon ki skur wa chem yei eh wa ye ki u pynsñiaw yei eh i khoo yong ki lyngba i thoh yow ye u yarap ya ki ha ki bynta waphær waphær.
Deiwa pynkynmoo u leh wa dang ini wa dep da saam Computer ki cha ki skur.
Kiwi won wa e i klam nadooh u Wailad Dameshwa Siangshai, u Gresentus Susngi wa u Rikut Pareiñ da yaroh ki yei heh mynsien wow chna kat kani ka skur, kamtæ e ki leh i kyrkhu kyrdoh yow nang ku kani ka skur u na ki snem cha ki snem, wei ki khynnah wa mih na kani ka skur leh u man ki kiwa tyrchaaiñ.
Neiliang ki bor pait bor pynlai kani ka skur ha kani ka sngi da pyntip ki leh wa nadooh ka 08-09-25 u sdang ki wow e Admission neibynta ki khynnah nadooh Tiny Tots hadooh Class V.
