I chlai um ha Punjab iwa joor bha ha ki 40 snem da wanrah i yei yap ki 29 ngut ki bru ha ki 12 tylli ki District ka jylla.
Ka sorkar da ong ko wa nadooh ka 1 tarik u Naisaphra hadooh 1 tarik u Naikhynde nei ku ka um ha ki wah ka Himachal Pradesh wa Jammu & Kashmir, 6 ngut da yap ki ha Pathankot District nei ku ka wah Ravi, mar le ngut ha Hoshiarpur, Amritsar, Ludhiana, Mansa, Rupnagar wa Barnala District.
Da yap leh uwi ha Bathinda, Gurdaspur, Patiala, Mohali wa ha Sangrur District.
Le ngut ki bru da wiar ki na Pathankot District nadooh wa sdang i chlai um.
Chirup wa ka wah Ravi da chlai leh ka wah Beas wa ka wah Sutlej kiwa da pynyhut ya ka Punjab iwa da wanrah ya i chlai um wa joor dooh nadooh u 1988.
Kiwa yap katkam ka khubor na ka sorkar toh nei chah riñ bordiñ, i oor ki yung wa i ngam um ha ki thaw wa joor i chlai um.
Da em leh palat 2.56 lak ngut kiwa da chah ktah nei chlai um wei iwa joor dooh toh ki 1.45 lak ngut ha Gurdaspur District donhi.
Hadien ka Gurdaspur da bood ki 35,000 ngut ha ki 88 chnong ka Amritsar District, 24,015 ngut ha ki 76 chnong ka Ferozepur District, 21,562 ngut ha ki 72 chnong ka Fazilka, ki 15,053 ngut ha ki 82 tylli ki chnong ka Pathankot District, ki 5,650 ngut ha ki 115 tylli ki chnong ka Kapurthala District wa 1,152 ngut ha ki 94 chnong ka Hoshiarpur District.
Chirup wa ki pulit ka State Disaster Response Force (SDRF), da em leh 20 Team na ka NDRF, 10 Column na ka Indian Army wa 35 tylli ki Helicopter wa yarap ya kiwa chah ktah.
